काळ्या गढीच्या जुन्या ओसाड भिंतीकडे
आलीस तू एकटी बांधून सारे चुडे.

काळ्या गढीच्या जुन्या ओसाड भिंतीकडे
आलीस तू चोरटी बांधुन सारे चुडे.

वारा किती मंद गऽ !
होते किती कुंद गऽ !
होता किती धुंद गऽ अंधार मागेपुढे !

काळी निनावी भीती
होती उभी भोवती
वाटेत होते किती काटेकुटे अन्‌ खडे.

माझी तुझी चोरटी
जेव्हा मिळाली मिठी
हुंकारले खालती आडातले पारवे.

हुंकारला पारवा
तेजाळला काजवा !
हालून गेला जरा काळोख चोहीकडे !