A Non-Profit Non-Commercial Public Service Initiative by Alka Vibhas   
केला करार त्यांनी

आपापल्या सुखाशी केला करार त्यांनी !
मी बोचताच माझी केली शिकार त्यांनी !

त्यांच्यासमान नाही येथे कुणी विचारी,
आजन्म फक्त केला त्यांचा विचार त्यांनी !

त्यांना पसंत नाही ताजा पहाटवारा,
आधीच बंद केले एकेक दार त्यांनी !

झाली जशी निकामी त्यांची जुनी हत्यारे,
माझ्यावरी दयेचा केला प्रहार त्यांनी !

माझ्या घरात आला पाऊस माणसांचा..
त्यांच्या घरात नेला त्यांचा पगार त्यांनी !
गीत- सुरेश भट
संगीत -
स्वर - सुरेश भट
गीत प्रकार - कविता

 

This 👇 player works on all android and iOS devices also
  सुरेश भट