A Non-Profit Non-Commercial Public Service Initiative by Alka Vibhas   
कुबेराचं धन माझ्या शेतात

देवावाणी शेत माझं नवसाला पावलं
कुबेराचं धन माझ्या शेतात घावलं

झाकली मूठ ही मिरगानं फेकली
निढळाची धार ती सर्गानी शिंपली
बाळरूप कोवळं शिवारात हासलं
धरतीच्या माउलीनं दिनरात पोसलं

तरारुन आला भरा गहू हरभरा
शाळूराजा डुलतोय झुलवीत तुरा
तरुणपण जवारीनं पानाआड झाकलं
चोच मारून पाखरू पिकामधी लपलं
कुबेराचं धन माझ्या शेतात घावलं

मोटेवरी रंगली ढंगदार लावणी
घुमवीत गोफणी सुरू झाली राखणी
लक्ष्मी ही देखणी रूप तिनं दावलं
दिवसाच्या डोळियांत नाही बघा मावलं
कुबेराचं धन माझ्या शेतात घावलं
गोफण - शेतातील धान्यावरील पक्षी उडवण्यासाठी दगड मारताना वापरावयाचे उपकरण.
मोट - विहिरीतून पाणी काढण्याचे मोठे पात्र.

 

This 👇 player works on all android and iOS devices also
  उषा मंगेशकर, पं. हृदयनाथ मंगेशकर