आतड्याची माया माझी तुझ्याविना पोरकी
लेक माझी लाडकी तू, लेक माझी लाडकी

झोपडीत बाई माझी दळिंदर ल्याली
काळजाच्या नरटीनं अमरुत प्याली
दिली तुला बसायाला झोळीची ग पालकी

पडंझडं मूल वाढं, तसा तुझा खेळ ग
अंगणात बागडली अबोलीची वेल ग
'आई' म्हणायाच्या आधी केली तुला पारखी

नावरूप आलं तुला, पीळ माझा सुटला
'उदो उदो' बघुनिया पांग सारा फिटला
किती तुझा थोरपणा काय माझी लायकी

एकदाच 'आई' असा बोल कानी यावा
तुझ्या मांडीवर पोरी जीव माझा जावा
शेवटच्या हुंदक्याला जिणं लागो सार्थकी