जाता जाता गाइन मी
गाता गाता जाइन मी
गेल्यावरही या गगनातिल
गीतांमधुनी राहिन मी.

माझे जगणे होते गाणे..

कधी मनाचे कधी जनाचे
कधी धनास्तव कधी बनाचे
कधी घनाशय कधी निराशय
केवळ नादतराणे..

आलापींची संथ सुरावळ
वा रागांचा संकर गोंधळ
कधी आर्तता काळजातली
केव्हा फक्त बहाणे..

राईमधले राजस कूजन
कधी स्मशानामधले क्रंदन
अजाणतेचे अरण्य केव्हा
केव्हा शब्द शहाणे..

जमले अथवा जमले नाही
खेद खंत ना उरली काही
अदृश्यातिल आदेशांचे
ओझे फक्त वहाणे..