A Non-Profit Non-Commercial Public Service Initiative by Alka Vibhas   
माझ्या प्रीतीच्या पांखरा

माझ्या प्रीतीच्या पांखरा रानभरी होऊ नको
माझ्या जिवाच्या मैतरा, देशांतरा जाऊ नको

जीवा घायाळ करीत आल्या पावसाच्या धारा
भांबावून वेड्यापरी झाला वेडापिसा वारा
पिसाट या वार्‍यासंगे दूर दूर वाहू नको

विसाव्याच्या वनराया किती कुंद कुंद झाल्या
गंध झोकुनी मातीचा दाही दिशा धुंद झाल्या
वेध लागुनी अनोखा टकामका पाहू नको

चोच घालुनी चोचीत खूणगांठ पटवावी
एकमेकांनी कुशीत देणीघेणी मिटवावी
घडीभराचा दुरावा विकोपाला नेऊ नको
गीत - वसंत बापट
संगीत - यशवंत देव
स्वर- शोभा जोशी
गीत प्रकार - भावगीत
रानभरी - अशांत.

Please consider the environment before printing.
कागद वाचवा.
कृपया पर्यावरणाचा विचार करा.