A Non-Profit Non-Commercial Public Service Initiative by Alka Vibhas   
मला आवडते वाट वळणाची

मला आवडते वाट वळणाची
दाट झाडीची नागमोडीची
ही अलीकडची नदिच्या थडिची
मला आवडते वाट वळणाची

मला आवडते वाट वळणाची
सरघसरणिची पायफसणिची
लवणावरची पानबसणिची
मला आवडते वाट वळणाची

मला आवडते वाट वळणाची
अशि भुलवणिची हुलकावणिची
सागवेळुच्या भर रानींची
मला आवडते वाट वळणाची

मला आवडते वाट वळणाची
जरा अडचणिची चढउतरणिची
घाटमाथ्याची ती पलीकडची
मला आवडते वाट वळणाची

मला आवडते वाट वळणाची
इथची तिथची कधिं कुणिकडची
क्षितिजाकडची पुढची पुढची
मला आवडते वाट वळणाची
गीत- कवी अनिल
संगीत - आनंद मोडक
स्वर - अजय गोगावले
गीत प्रकार - भावगीत
थड - नदीचा तीर, किनारा.
लवण - खोलगट जागा.