नाही येथे कुणी कुणाचा
स्वार्थ हा एकच न्याय जगाचा !

कुणी न इथला नित्‌ रहिवासी
जो जो आला जाणे त्यासी
स्वार्थ सुटेना परि तयासी
स्वार्थास्तव कुणि इमान विकती
कोणी विकती वाचा !

बळी कुणी स्वार्थाचे होती
जिवंत तेही मरण भोगती
भुतासारखे जगी वागती
शाप बाधतो परि तयांना
तळमळत्या आत्म्यांचा !

सावध सावध सोडव विळखा
दूर सारुनी फसवा बुरखा
पारखून घे अपुला परका
मायावी मयसभा असे ही
रंगमंच कपटाचा !