A Non-Profit Non-Commercial Public Service Initiative by Alka Vibhas   
नमनें वाहुनि स्तवनें

नमनें वाहुनि स्तवनें उधळा, जयजयकार करा,
बंधुहो । जयजयकार करा,
सकल मनांचा विकास येतो आज आपुल्या घरा.

विमलहास्यसुमवृष्टीमध्यें असो तुझें स्वागत,
निरंतर । असो तुझें स्वागत,
परमात्म्याच्या चित्सौंदर्या, येई बा हांसत.

आत्मवेलिच्या स्फूर्तिफुलांवर वसंत जे विकसती,
बुद्धिचे । वसंत जे विकसती,
त्याच वसंतां, तदिय विकासा, सरस्वती बोलती.

विश्वकाव्य वाचीत बैसली चित्तमयूरावरी,
दीप्ति जी । चित्तमयूरावरी,
त्या दीप्तीला, त्या ज्ञप्तीला, वदती वागीश्वरी.

हे वाग्देवी, असे प्रार्थना ये या संकीर्तना,
उत्सवा । ये या संकीर्तना,
जगन्मंगले, सकल मंगलासह दे पददर्शना.