A Non-Profit Non-Commercial Public Service Initiative by Alka Vibhas   
न्हाऊन उभी ग राहून

न्हाऊन, उभी ग राहून उदविशी केस
लक्ष्मी यावी सागरी, जळातुनी वरी, तशी ग दिसतेस!

चंद्रमा मुखावर जडे, काय तुजपुढे कौस्तुभा शोभा?
भुवईचे धनु खेचवी, रसिक नाचवी लोचनी रंभा
राहसी उभी उर्वशी, घेउनी कुशी वारुणीकुंभा
अधरांत सौख्यसंपदा, सांडते सुधा, जधी ग हसतेस!

इंद्राच्या घरचा करी तुझा ऋणकरी, अशी मदभरी चालशी मंद
प्राजक्त तुझ्या श्वासांत, त्याच वासात तुझी तू धुंद
अशी अमोल रत्‍नावली, येसी भूतली म्हणून वर्णिली, का ग रुसतेस?

हा तुझा धुपाचा वास, रूपाचा श्वास, जाईल ग खास तयांच्या मार्गी
येतील रसिक धावुनी, तुला पाहुनी मनी मोहुनी, थांबतील जागी
झुरतील, किती ग मरतील, गात फिरतील तुला ग दरवेस!
गीत- ग. दि. माडगूळकर
संगीत - वसंत पवार
स्वर - गीता दत्त
चित्रपट- शाहीर परशुराम
गीत प्रकार - चित्रगीत
उदविणे - केसांना उदाची धुरी देणे.
करी - हत्ती.
कौस्तुभ - समुद्रमंथनातून वर आलेल्या चौदा रत्‍नांतील एक रत्‍न.
जधीं - जेव्हां, ज्या दिवशी.
दरवेश - फकीर, फिरता भिक्षेकरी.
वारुणी - मद्य, दारू.
सुधा - अमृत / सरळ, योग्य मार्गाने जाणारा.