A Non-Profit Non-Commercial Public Service Initiative by Alka Vibhas   
पहिलीच भेट झाली

पहिलीच भेट झाली, पण ओढ ही युगांची
जादू अशी घडे ही या दोन लोचनांची

पहिलीच भेट झाली, जडली अपूर्व बाधा
स्वप्‍नात गुंग झाली जागेपणात राधा
माझी न रहिले मी, किमया अशी कुणाची?

डोळे मिटून घेता दिसतेस तू समोर
फुलवून पंख स्वप्‍नी अन्‌ नाचतात मोर
झाली फुले सुगंधी माझ्याहि भावनांची

लाजून वाजती या अंगातुनी सतारी
ऐश्वर्य घेउनी हे ये दैव आज दारी
मी लागले बघाया स्वप्‍नेहि मीलनाची

वार्‍यात ऐकतो मी आता तुझीच गाणी
तार्‍यांत वाचतो अन्‌ या प्रीतिची कहाणी
पहिलीच भेट झाली, पण ओढ ही युगांची
जादू अशी घडे ही या दोन लोचनांची

Please consider the environment before printing.
कागद वाचवा.
कृपया पर्यावरणाचा विचार करा.


Random song suggestion
  अरुण दाते, सुमन कल्याणपूर