A Non-Profit Non-Commercial Public Service Initiative by Alka Vibhas   
ये पिकवूं अपुलं शेत

ये पिकवूं अपुलं शेत मंजुळे उगवूं मोतीचुरा
तुझ्या नि माझ्या रानप्रीतिचा झुळझुळ वाहे झरा

गुणगुणत करूं लावणी
घरधनीण अन्‌ घरधनी
हळदीचे फिरती हात नांदती लक्षुमि माझे घरा
मंजुळे उगवूं मोतीचुरा

हे ओलवतीचं पाणी
करि बोलवती ही राणी
वर अंबर भरलं, सरसर झरलं, भिजली सारी धरा
मंजुळे उगवूं मोतीचुरा

बघ भरारला जोंधळा
हालते पात सळसळा
ते हिरवे लोलक डुलति मजेनं भरला ग हरभरा
मंजुळे उगवूं मोतीचुरा

मोत्यांची आंतरमाया
संभाळ कोवळी काया
येईल कळप राघुचा मारिते साळुंकी लहरा
आली ज्वानि तुझी बहरा
मंजुळे उगवूं मोतीचुरा
गीत - राजा बढे
संगीत - गजानन वाटवे
स्वर- मालती पांडे
गीत प्रकार - भावगीत
लहरा - तान.

Please consider the environment before printing.
कागद वाचवा.
कृपया पर्यावरणाचा विचार करा.