A Non-Profit Non-Commercial Public Service Initiative by Alka Vibhas   
पांडुरंग त्राता पांडुरंग दाता

पांडुरंग त्राता : पांडुरंग दाता
अंतींचा नियंता पांडुरंग

दयेचा सागर : मायेचें आगर
आनंदाचें घर पांडुरंग

भक्तीचा ओलावा : दृष्टीचा दिष्टावा
श्रद्धेचा विसावा पांडुरंग

तप्तांचें चंदन : दीप्तांचें इंधन
प्रकाशवर्धन पांडुरंग

अंगसंगें त्याच्या झालो मी निःसंग
देहींचा साष्टांग पांडुरंग
गीत - बा. भ. बोरकर
संगीत - राम फाटक
स्वर- पं. जितेंद्र अभिषेकी
गीत प्रकार - विठ्ठल विठ्ठल, भक्तीगीत
  
टीप -
• काव्य रचना- ८ सप्‍टेंबर १९८१.
आगर - वसतिस्थान.
दिष्टावा - द्रष्टेपण.
दीप्‍ती - तेज.

Please consider the environment before printing.
कागद वाचवा.
कृपया पर्यावरणाचा विचार करा.