A Non-Profit Non-Commercial Public Service Initiative by Alka Vibhas   
पिकल्या पानाचा देठ की हो

दरबार जुना ह्यो, हंड्या झुंबर नवं
मध्यान रातीला आता लावा अत्तर-दिवं
अंगाअंगी मी रंग खेळते, केसांमधी मरवा
पिकल्या पानाचा देठ की हो हिरवा !

नख लागंल बेतानं खुडा
केशरी चुना अन्‌ कात केवडा
लई दिसानं रंगल्‌ विडा
व्हटाची लाली टिपुनी घ्याया
मुखडा असा फिरवा
पिकल्या पानाचा देठ की हो हिरवा !

थोडी झुकून थोडी वाकते
पडला पदर, लाज झाकते
नेम धरून बाण फेकते
तुमची माझी हौस इश्काची
हळूहळू पुरवा
पिकल्या पानाचा देठ की हो हिरवा !
गीत - जगदीश खेबूडकर
संगीत - राम कदम
स्वर- शोभा गुर्टू
चित्रपट - कलावंतीण
राग - यमन
गीत प्रकार - चित्रगीत, लावणी