A Non-Profit Non-Commercial Public Service Initiative by Alka Vibhas   
प्रार्थना देवा तुला ही

प्रार्थना देवा तुला ही, तू सदा जवळी रहा
मी जिथे जाईन तेथे प्रेमदृष्टीने पहा

दुःख जेव्हा दाटूनीया भार होतो अंतरी
मी कसे विनवू तुला रे, धाव तू गरूडापरी
संकटांशी झुंजण्याला हात दे मजला दहा

स्वैर वेगे जीवनाचा धावतो रथ सारखा
संयमाचा पथही माझ्या लोचनांना पारखा
सारथी होऊन आता आवरी अपघात हा

आस नाही मज कशाची, खंत नाही मानसी
तू नभाच्या लोचनांनी सर्व काही जाणसी
देह हा कर्मांत सरुनी, सफल होवो जन्म हा