A Non-Profit Non-Commercial Public Service Initiative by Alka Vibhas   
रघुपति राघव गजरी गजरी

रघुपति राघव गजरी गजरी
तोडित बोरे शबरी

ध्यानी जपली मनी पूजिली
रघुनाथाची मूर्त सावळी
बघावयाला याच डोळी
आतुरलेली किती अंतरी

रामनाम ते वदता वाचे
अमृत लाघव अधरी नाचे
हाती येता फळ भक्तीचे
चाखित होती नाम माधुरी

भजनी रमुनी भिल्लिण शामा
म्हणते लवकर ये रे रामा
आलिंगुनीया भक्ति प्रेमा
स्वर्ग बघू दे मला भूवरी
गजर - घोष.
भू - पृथ्वी / जमीन.
लाघव - आर्जव / माया.
शबरी - एक भिल्लीण. श्रीरामांची एकनिष्ठ भक्तीण.