A Non-Profit Non-Commercial Public Service Initiative by Alka Vibhas   
राहिले रे अजून श्वास किती

राहिले रे अजून श्वास किती?
जीवना, ही तुझी मिजास किती?

आजची रात खिन्‍न तार्‍यांची..
आजचा चंद्रही उदास किती?

मी कसे शब्द थोपवू माझे?
हिंडती सूर आसपास किती!

दु:ख माझे.. विरंगुळा त्यांचा..
मी करावे खुळे कयास किती?

ओळखीचे कुणीतरी गेले..
ओळखीचा इथे सुवास किती!

हे कसे प्रेम? या कशा आशा?
मी जपावे अजून भास किती?

सोबतीला जरी तुझी छाया..
मी करू पांगळा प्रवास किती?
गीत- सुरेश भट
संगीत -
स्वर - सुरेश भट
गीत प्रकार - कविता