A Non-Profit Non-Commercial Public Service Initiative by Alka Vibhas   
सप्तपदी हे रोज चालते

सप्तपदी हे रोज चालते
तुझ्यासवे ते, शतजन्मीचे हो माझे नाते

हळव्या तुझिया करात देता
करांगुली ही रूप गोजिरी
गोड शिरशिरी उरात फुलता
स्पर्शाने जे मुग्ध बोलते

करकमळाच्या देठांभवती
झिम्मा खेळत प्रीत बिलवरी
दृष्ट लाजरी जरीकाठी ती
तुझ्या लोचने वळुनी बघते

आठवे पाऊल प्रीत मंदिरी
अर्धांगी मी सगुण साजिरी
मूर्त होता तुझ्या शरीरी
अद्वैताचे दैवत होते
गीत- पी. सावळाराम
संगीत - वसंत प्रभू
स्वर - लता मंगेशकर
गीत प्रकार - भावगीत
झिम्मा - लहान मुलींचा एक खेळ.
बिलवर - उच्‍च प्रतीची काचेची बांगडी.