सारी भगवंताची करणी
अधांतरी हे झुले नभांगण शेषफणावर धरणी

लक्ष्मीसाठी घर गर्वाचे उंच बांधुनी देतो
गरिबासाठी गरीब होऊन झोपडीतही रमतो
पतितासंगे पतितपावन चालतसे अनवाणी

समुद्रात जरी अथांग पाणी, तहान शमवी श्रावणधार
अन्‍नब्रह्म ते अखंड घेते काळ्या मातीतून अवतार
जगण्यासाठी तरी मानवा लाग प्रभूच्या चरणी

जिथे वाजतो घुंगुरवाळा, बालक होऊन तिथे रांगतो
मायबाप तो सर्व जगाचा आईसाठी जगात येतो
हात जोडुनी देव बोलतो शरण तुला गे जननी