थंड या हवेत घेऊन कवेत साजणा झुलव मला
साजणा रे, मोहना रे, ऐकना रे
तुझ्याचसाठी रे तुझ्याचसाठी
सगेसोयरे मी सांडिले पाठी
मोहन मधुर राती
भराला येऊ दे प्रीती
प्रीतीची हीच ना रीती?
कशाला कुणाची भीती?
झाडामागे चांद हा वरती आला
ये ना, ये ना? आतुर जीव हा झाला
मी भूलावे, स्वैर व्हावे, गीत गावे
वार्यात लहर मंद
फुलांचा मादक गंध
मोगरा चमेली कुंद
जिवाला करिती धुंद
माझ्या देही पुनवचांदणे साजे
प्राणांमध्ये प्रीतीची पावरी वाजे
आज राया, धुंद काया, मोहवाया
| गीत | - | शान्ता शेळके |
| संगीत | - | हेमंत भोसले |
| स्वर | - | आशा भोसले |
| गीत प्रकार | - | शब्दशारदेचे चांदणे, कल्पनेचा कुंचला, भावगीत |
| कुंद | - | एक प्रकारचे सुवासीक, पांढरे फुल / एक प्रकारचे गवत / स्थिर हवा. |
| पावरी | - | बासरी. |
| शारद | - | शरद ऋतू मधली. |
हेमंत भोसले यांची उडती चाल, समर्पक स्वरमेळ आणि आशाताईंचा चिरतरूण आवाज, उत्फुल सादरीकरण यात शब्दरचनेत आलेला तसा सरधोपट यमक (प्रीती-भीती-रीती-राती, मंद-गंध-धुंद-कुंद) लपून गेला आहे.
'सगेसोयरे मी सांडिले पाठी' मात्र खास शान्ताबाई !
पिढ्यांच्या पलीकडे या गाण्याने लोकप्रियता जपली आहे ती संगीताची लय परावर्तीत करून ऐकणार्याचे शरीर आणि मन दोलायमान करण्याच्या त्याच्या ताकदीवर.
अलका विभास* 'आठवणीतली गाणी'वर प्रसिद्ध झालेले ब्लॉग्ज कॉपी-पेस्ट करणे अनधिकृत आणि अनैतिक आहे. या लिखाणाचा कुठल्याही प्रकारे वापर करण्याआधी लेखकाची परवानगी घेणे बंधनकारक आहे.
* ही लेखकाची वैयक्तिक मते आहेत. या लेखात व्यक्त झालेली मते व मजकूर यांच्याशी 'आठवणीतली गाणी' सहमत किंवा असहमत असेलच, असे नाही.
Please consider the environment before printing.
कागद वाचवा.
कृपया पर्यावरणाचा विचार करा.
दाद द्या अन् शुद्ध व्हा !