A Non-Profit Non-Commercial Public Service Initiative by Alka Vibhas   
थंड ही हवा धुंद गारवा

थंड ही हवा, धुंद गारवा
हा पाऊस रिमझिम बरसे !

रेशिमधारा या रुणझुणती
जलथेंबांचे उधळित मोती
पानफुले नाचती, गंधफुले भोवती
झुलती जलांचे आरसे !

काजळकाळ्या या आकाशी
वीज रेखिते सुंदर नक्षी
वारा खुळा होउनी, नाचे कसा अंगणी
गाणे खुषीचे गातसे !

हिरवी शेते हिरवी राने
फुलली भवती हिरवी कवने
नटली बघा ही धरा, झोक तिचा साजिरा
नवरी नवेली ही दिसे !

 

Print option will come back soon