ती पहा ती पहा बापुजींची प्राणज्योती
तारकांची सुमनमाला देव त्यांना वाहती

झुंजला राजासवें हा रंगला रंकासवें हा
पेटतां देहेहि आतां दिव्यता दावून जाती

चंदनाचें खोड लाजे हा झिजे त्याहूनही
आज कोटी लोचनांच्या अश्रुमाला सांडताती

पृथ्वीच्या अक्षांशीं लाली, पृथ्वीच्या रेखांशीं लाली
चार गोळ्या ज्या उडाल्या दशदिशांना कापिताती

नांव ज्याचें ऐकुनिया थरकली सिंहासने
ना जरी तलवार हाती हा अहिंसेचा पुजारी

सत्य मानी देव आणि झुंजला खोट्यासवें हा
मृत्युच्या अंतीम वेळी नांव रामाचें मुखीं

सिंधु गंगा आणि यमुना धन्य झाली अस्थिंनी
राख तुझी भारताच्या तिलक झाली रे ललाटी