तुझ्याचसाठी राजसा
मी विनवणी करिते थांब ना
माझी रातदिन झुरते काया
तुझ्या मूठभर पैशासाठी रे
माझी लाखाची प्रीत जाई वाया

या झाडाचे हे सुंदरसे पान मी तोडुनिया
या नाजुकशा किरकणीने ते दुमडुनिया
मी केली त्याची शिट्टी रे
अन्‌ वाजविली तुजसाठी रे
तू ऐकलीस नाही राया
तुझ्या मूठभर पैशासाठी रे
माझी लाखाची प्रीत जाई वाया

वाट बघुनी डोळे शिणले
प्रीत कशी तुज अजुनी नकळे
रिमझिम रिमझिम मेघ बरसले
तरुवर सारे खुलुनी बहरले
हे दु:ख कुणाला सांगू रे
मन माझे आहे भाबडे
घुटमळते तुज सांगाया
तुझ्या मूठभर पैशासाठी रे
माझी लाखाची प्रीत जाई वाया