त्या पैलतिरावर मिळेल मजला थारा
सुहृदांची प्रेमळ सोबत आणि उबारा !

इकडच्या तटावर झाले ध्वस्त निवारे
जळतात पावलांखाली क्रुद्ध निखारे
मी तळमळताही निर्विकार जन सारे
पण तिथे वाहतो प्रसन्‍न शीतल वारा !

ऐकली न येथे आपुलकीची बोली
बहरली न आशा मनात अंकुरलेली
सारखी विफलता व्यथा माझिया भाली
पलीकडे हासतो जीवन-श्रेय-फुलोरा !

पलीकडे मनोमय स्वप्‍नांचा संसार !
पलीकडे सुगंधित गीतांचा झंकार !
संतप्त उरास्तव वत्सल अमृतधार !
बहरला मळ्यांनी वैभवपूर्ण किनारा !