जय हिन्‍द !
वार्‍यावरती ध्वज हा फडके, करीतसे ललकार !

स्वातंत्र्याचा करीत पुकार
हिन्दभूमीचा करीत पुकार
प्रिय जननीचा करीत पुकार
सर्व दिशांना ध्वज हा आमुचा, करितो जयजयकार !

सह्याद्रीच्या शिखरावरती
स्वातंत्र्याची ज्योत जागती
ही गगनीची वीज चमकती
मनात आमुच्या ही लखखती, ही लखलखती धार !

उंच हिमालय उत्तरेकडे
सागर गर्जे दक्षिणेकडे
धन-धान्याचे मळे चहुंकडे
मधून वाहे या भूमीतून प्रिय गंगेची धार, प्रिय कृष्णेची धार !

पुढे पुढे हा ध्वज फडफडे
पुढे पुढे पाऊल पडे
क्षितिज नवे हे पुढे उलगडे
नवीन किरणे नवीन गाणे, गाती नव्या युगाचे स्वार !