या रावजी, बसा भाओजी
कशी मी राखू तुमची महरजी?
हो बसा रावजी

वळख जुनी तुमची धरून मनी
काय करू सांगा तुमची अहरजी

तुम्हा बघुन डावा डोळा झाकला
पडदा लाजंचा लाजंचा फेकला !

गुलहौशी तुम्ही, मी अशी गुलछडी
तुम्हासाठी नटुन आज राहीन खडी
अशी रोखा नजर, त्यात भरलं जहर
घोट घेऊन जीव ह्यो माझा झिंगला
पडदा लाजंचा लाजंचा फेकला !

रूपरंगाच्या महाली सुख माझं रंगलं
काळजाच्या झुंबराला दु:ख माझं टांगलं
नको पर्वा आता, माझं जीणं लुटा
असा जुगार उलटा मी हो मांडला
पडदा लाजंचा लाजंचा फेकला !

रोज बुरखा नवा, रोज नवी मजा
तुम्ही गुन्हा करा मी हो भोगीन सजा
तुमची वळख धरीन, बाकी चुकती करीन
ध्यास तुमचा मनाला पाव्हणं लागला
पडदा लाजंचा लाजंचा फेकला !