A Non-Profit Non-Commercial Public Service Initiative by Alka Vibhas   
अखेरचे येतिल माझ्या

अखेरचे येतिल माझ्या हेच शब्द ओठी
लाख चुका असतिल केल्या केली पण प्रीती

इथे सुरू होण्याआधी संपते कहाणी
साक्षीला केवळ उरते डोळ्यांतिल पाणी
जखम उरी होते ज्यांच्या तेच गीत गाती

सर्व बंध तोडुनि जेव्हा नदी धुंद धावे
मीलन वा मरण पुढे हे तिला नसे ठावे
एकदाच आभाळाला अशी भिडे माती

गंध दूर ज्याचा आणिक जवळ मात्र काटे
असे फूल प्रीती म्हणजे कधी हाय वाटे
तरी गंध धुंडित धावे जीव तुझ्यासाठी

आर्त गीत आले जर हे कधी तुझ्या कानी
गुज अंतरीचे कथिले तुला या स्वरांनी
डोळ्यांतुन माझ्यासाठी लाव दोन ज्योती
गीत- मंगेश पाडगांवकर
संगीत - यशवंत देव
स्वर - अरुण दाते
गीत प्रकार - भावगीत
आर्त - दु:ख, पीडा.
गुज - गुप्‍त गोष्ट, कानगोष्ट.

 

Random song suggestion
This 👇 player works on all android and iOS devices also
  अरुण दाते