A Non-Profit Non-Commercial Public Service Initiative by Alka Vibhas   
भेटीलागीं जीवा लागलीसे

भेटीलागीं जीवा लागलीसे आस ।
पाहे रात्रीं दिवस वाट तुझी ॥१॥

पूर्णिमेचा चंद्रमा चकोरा जीवन ।
तैसें माझें मन वाट पाहें ॥२॥

दिवाळीच्या मुळा लेंकी आसावली ।
पाहतसे वाटुली पंढरीची ॥३॥

भुकेलिया बाळ अति शोक करी ।
वाट पाहे परि माउलीची ॥४॥

तुका ह्मणे मज लागलीसे भूक ।
धांवुनि श्रीमुख दावीं देवा ॥५॥
आसवणे - आतुर, उत्सुक, आशायुक्त.
चकोर - चांदणे हेच ज्याचे जीवन असा एक पक्षी.
मूळचिठ्ठी - आमंत्रण.
भावार्थ-

  • देवा, माझ्या जिवास तुझ्या भेटीची फार इच्छा उत्‍पन्‍न झाली आहे. रात्रंदिवस मी तुझी वाट पहातो आहे.
  • पूर्णिमेचा चंद्र हे जसे चकोर पक्ष्याचे जीवन आहे तसेच माझ्या मनाला तुझी भेट हेच जीवन आहे. माझे मन तुझी वाट पाहते आहे.
  • दिवाळीच्या वेळी लेक जशी माहेराहून आईबापांचे बोलावणे येण्याची वाट पहाते, अगदी तशीच मी पंढरपुराची वाट पाहतो आहे.
  • भुकेलेले बालक आईकरिता फार शोक करते, तिची सारखी वाट पहात असते..
  • तुकाराम महाराज म्हणतात, हे देवा, मला तुझ्या भेटीची फार भूक लागलेली आहे, तरी धावून ये. दर्शन देऊन भेटीची भूक नाहीशी कर.

गो. वि. नामजोशी
'संत तुकारामाची सार्थ अभंगवाणी' या गो. वि. नामजोशी लिखित पुस्तकातून.
सौजन्य- सुलभ प्रकाशन, मुंबई.

* ही लेखकाची वैयक्तिक मते आहेत. या लेखात व्यक्त झालेली मते व मजकूर यांच्याशी 'आठवणीतली गाणी' सहमत किंवा असहमत असेलच, असे नाही.

  इतर भावार्थ

Please consider the environment before printing.
कागद वाचवा.
कृपया पर्यावरणाचा विचार करा.