भूमातेच्या कुशीतला हा अमुचा कोकण देश
डोंगराळ अन् चिकणमातीचा श्रमवंतांचा देश

निसर्गाच्या संपत्तीचे याच्या हृदयी झरे
दौलत लुटवी उदार हस्ते देण्या पुढती सरे
संजीवनी औषधी तरू-लता गंधगुणे फुलती
नारळ-कोकम-फणस-सुपारी-करवंदे पिकती
अंबे-केळी-काजू-रामफळ अमोल संपत्ती
परशुरामश्री विंध्यवासिनी ह्या क्षेत्री वसती
डोंगर-किल्ले स्फूर्तिदायी वीरांचे अवशेष

तांबडमाती ताना-येसा श्री शिवतेजाची
समाधान कष्टांची भूमी, समता ज्ञानाची
सावित्री वसिष्ठी शरावती जलनिधी वैभव हे
लोकजीवनी या संजीवनीसंगे मन वाहे
पयधारांनी भिजली कणकण नटली ही धरती
वैतरणा-कोयना-तानसा अमृतमय वाहती
सातत्याने काम करा रे हा त्यांचा संदेश

मराठ-कुणबी साधा भोळा तुकयाची वृत्ती
सुदूरदर्शी राजकारणी रामदासी वृत्ती
मातृभूमीवर शत्रू येउनी उगारील हात
कोटी हस्त तयांवर पडतील तोडाया हात
निधडे सैनिक पुढे धावती वीरांचा आवेश