सुधीर मोघे सरांशी गप्पा मारताना एकदा 'दिस जातील, दिस येतील..' या गाण्याचा संदर्भ धरून मी त्यांना विचारले की चित्रपटाच्या एकूण मूडमुळे गाण्याच्या वैयक्तिक आशयावर कितपत परिणाम होतो?
खरं म्हणजे गाण्याचे शब्द प्रचंड आशावादी.. पण एक तर चित्रपटाचे नाव 'शापित' व एकूणच त्या नायक-नायिकेची होणारी परवड.. त्यामुळे जेंव्हाजेंव्हा या गाण्याचा विषय निघे, आजूबाजूचे कोणीतरी हमखास बोलून जात, “पण या गाण्यानंतर त्यांचे फार हाल होतात ना?”

सर म्हणाले.. “चांगलं चित्रपटगीत ओळखण्याची अगदी सोपी व्याख्या सांगू का? चित्रपटात असताना ते त्या कथेमध्ये पूर्णपणे विरघळून जायला हवं.. पण चित्रपटाच्या बाहेर ते मूळ कथेच्या सीमा ओलांडून तुझ्या-माझ्या आयुष्यात शिरायला हवं. बर्‍याच जणांना या गाण्यापेक्षाही चित्रपटातील नायक-नायिकेवर होणारा अन्याय जास्त लक्षात राहतो.. त्याला पर्याय नाही. पण अगदी 'शापित' न पाहिलेल्या अनेकांना हे गाणं त्यांच्या मनातील आशेच्या अंकुराशी, अपराजित आशावादाशी नाळ जोडणारं वाटतं. शेवटी कुणी काय बघायचं.. काय घ्यायचं.. ते ज्याने त्याने ठरवावं!”

  अमित करकरे

('आठवणीतली गाणी'वर प्रसिद्ध झालेले ब्लॉग्ज कॉपी-पेस्ट करणे अनधिकृत आणि अनैतिक आहे. या लिखाणाचा कुठल्याही प्रकारे वापर करण्याआधी लेखकाची परवानगी घेणे बंधनकारक आहे.)