कावळा पिपेरी वाजवतो
मामा मामीला नाचवतो

लग्‍नाचा थाट तुम्ही कमी करा
हुंड्याची चाल आता बंद करा
कपड्याची फॅशन आवरा जरा
सुखाचा संसार आपला करा
घुमघुम गावात गाजवतो
मामा मामीला नाचवतो

मामीला झाली पोरं ही फार
खर्चानं झाला मामा बेजार
पोरांचा वाटतो नको हा भार
दोघांना पडला मनी विचार
त्रिकोण निशाण दाखवतो
मामा मामीला नाचवतो

ताडी-दारुला शिवू नका
सोन्याचा संसार बुडवू नका
देशाची दौलत उधळू नका
जनसेवेला विसरू नका
आपल्या देशाला वाचवतो
मामा मामीला नाचवतो