एखाद्या मोगर्‍याचा वेल पाहतापाहता मांडव व्यापून जावा.. त्याच्या फुलांनी, कळ्यांनी, सारे आसमंत गंधित होऊन जावे, तसे भक्ताच्या मनातले इवलेसे आत्‍मतत्‍व पाहतापाहता आकाशभर झाले आणि सर्व आसमंतच गंधित होऊन गेला. आत्‍मतत्त्वाच्या मनोवेलीला फुले आली ती परमेश्वरामुळेच. तेव्हा या सार्‍या फुलांचा शेला करून परमेश्वरालाच अर्पिला पाहिजे.

येथे मोगर्‍याच्या वेलीमुळे आत्‍मतत्त्वाचे व्यापक होणे सहजपणे साकार झाले आहे.

डॉ. नागनाथ कोत्तापल्ले, डॉ. द. ता. भोसले
ज्ञानेश्वरांचे निवडक शंभर अभंग
सौजन्य- प्रतिमा प्रकाशन, पुणे

  इतर भावार्थ

निवृत्तिनाथांनी एक लहानसेच दिसणारे आत्मज्ञानाचे बीज पेरेले. त्यातून एक जीवनव्यापी उपासनेची वेल अंकुरित होऊन आकाशावर चढली. बघताबघता तिला विविध विचाररूपी असंख्य फुले लागली. जितकी वेचावी, तितकी नवीन येतच आहेत ! ही विचार-कुसुमें मननाच्या गुंफणीत गुंफण्याचे भाग्य, ज्ञानदेव म्हणतो, मला लाभले. ज्ञानदेवाने त्यांचा सुंदर हार रचून ते उत्तरीय भगवंताला समर्पित केले आहे.

आचार्य विनोबा भावे
ज्ञानेश्वरांची भजनें
सौजन्य- परंधाम प्रकाशन, वर्धा

  इतर भावार्थ