A Non-Profit Non-Commercial Public Service Initiative by Alka Vibhas   
पहिले भांडण केले कोणी

पहिले भांडण केले कोणी?
सांग रे राजा, कशि रुसून गेली राणी

अडखळला का पाय जरा?
वळता गळला का गजरा?
लटका होता राग मुखावर डोळ्यांत लटके पाणी

मान वेळता खेळ कळे
दंवात फुलले दोन कळे
थरथरणारे ओठ जहाले क्षणांत हसल्यावाणी

कलह प्रीतिचा गोडीचा
विलास जमल्या जोडीचा
विरह नकोसा तरीही सुंदर, जीव गुंतता दोन्ही !
कळा - मोठी कळी.
वेळावणे (वेळणे) - सैल सोडून हलविणे.

 

  मालती पांडे ( बर्वे )