धाले	-	(धालेपण) तृप्‍ती.
राजस	-	सुंदर / रजोगुणी.
लेणे	-	वस्‍त्र / अलंकार / भिंतीवरील अथवा दगडावरील कोरीव काम.

'राधामाई' नाटकानेही आम्हांला तसे आर्थिक यश दिले नाही. अतिशय सुंदर नेपथ्यांत या नाटकाचा प्रयोग होई. बहुसंख्य प्रेक्षकांनाही तो आवडे, पण उत्पत्राचा आकडा क्वचितच हजाराच्या घरात जाई. त्यावेळी थिएटरांची भाडी अगर जाहिरातींचे दर आजच्यासारखे भरमसाट नव्हते, हे जरी खरे असले, तरी जमाखर्चाची तोंडमिळवणी करताना आम्ही मेटाकुटीला येत असू. 'राधामाई' बरोबर कुलवधू, रंभा, विद्याहरण, 'कोणे एके काळ” वगैरे जुन्या नाटकांचे प्रयोगही मुंबईत व बाहेरगावी केले जात होते.

मे महिन्यात श्रीमंत रसिक मंडळी महाबळेश्वरला हवेसाठी जात, त्याचा फायदा घेण्यासाठी त्या वर्षी आम्ही तेथे कच्चे थिएटर बांधून चारपाच प्रयोग केले. पण कधी नव्हती ती पावसाची झिमझिम तेथे मे महिन्याच्या मध्यापूर्वी सुरू झाली आणि महाबळेश्वरला हवेसाठी आलेली नाजुक श्रीमंत मंडळी त्या 'ओपन एअर थिएटर'त येण्यास कांकू करू लागली. त्यामुळे कच्चे थिएटर का होईना, पण ते बांधण्यासाठी पुण्याहून सामान नेण्याआणण्याचा जादा खर्च बोकांडी बसला आणि नुकसानीत आणखी भर पडली.
(संपादित)

मो. ग. रांगणेकर
'असा धरि छंद' या मो. ग. रांगणेकर यांच्या पुस्तकातून. लेखन सहकार्य जयवंत दळवी.
सौजन्य- सन पब्लिकेशन्स्‌, पुणे

* ही लेखकाची वैयक्तिक मते आहेत. या लेखात व्यक्त झालेली मते व मजकूर यांच्याशी 'आठवणीतली गाणी' सहमत किंवा असहमत असेलच, असे नाही.

  इतर संदर्भ लेख