दामिनी

-

सौदामिनी, आकाशात चमकणारी वीज.

आकाशवाणीच्या बहुतेक केद्रांवरून मासिक गीताचा एक विशेष कार्यक्रम केला जातो. नागपूरला मी तो 'सोनिया सुगंधू आला' या शीर्षकाखाली सादर करीत होतो. पुण्याला 'स्वरचित्र' या शीर्षकाखाली मासिक गीत सादर करण्याची कल्पना मी मांडली. त्याला मंजुरी मिळून तो कार्यक्रम मूर्त स्वरूप घेऊ लागला. त्यातली कल्पना अशी होती, की एखादं दर्जेदार काव्य निवडावं. ते श्रोत्यांना वाचून दाखवावं. एखाद्या अधिकारी व्यक्तीला त्या काव्याचं थोडक्यात रसग्रहण करायला सांगावं आणि मग एखाद्या चांगल्या संगीत दिग्दर्शकाकडून ते स्वरबद्ध करून श्रोत्यांना ऐकवावं. सवंग लोकप्रियतेपेक्षा प्रतिष्ठित लोकप्रियता अपेक्षित होती. 

अनेक कवी, अनेक संगीतकार, अनेक गायक आणि साहित्यिक यांचं योगदान या कार्यक्रमाला लाभलं, लाभत आहे. अशा या दर्जेदार कार्यक्रमाचा उद्गाता मी आहे, याचा मला रास्त अभिमान आहे.

कार्यक्रमाचं स्वरूप कालमानाप्रमाणे किंवा गरजेप्रमाणे म्हणा, बदललं आहे. सुरुवातीला योजलेला साहित्य आणि संगीत यांचा प्रतिष्ठित आणि दर्जेदार आविष्कार कितपत टिकून आहे, हे जाणत्या श्रोत्यांनीच ठरविलेलं बरं.

'स्वरचित्र' या कार्यक्रमात प्रथम सादर झालेलं गीत म्हणजे 'तापल्या आहेत तारा तोवरी गाऊन घे.' कविश्रेष्ठ बोरकरांचं हे गीत गायिलं आहे प्रसिद्ध भावगीत गायक सुधीर फडके यांनी, आणि त्याचं रसग्रहण केलं आहे, प्रसिद्ध साहित्यिक गोपिनाथ तळवलकर यांनी. संगीत दिग्दर्शन माझं आहे.
(संपादित)

राम फाटक
'माझी स्वरयात्रा' या राम फाटक लिखित पुस्तकातून.
सौजन्य- राजहंस प्रकाशन, पुणे.

* ही लेखकाची वैयक्तिक मते आहेत. या लेखात व्यक्त झालेली मते व मजकूर यांच्याशी 'आठवणीतली गाणी' सहमत किंवा असहमत असेलच, असे नाही.

  इतर संदर्भ लेख