A Non-Profit Non-Commercial Public Service Initiative by Alka Vibhas   
या वार्‍याच्या बसुनी विमानी

या वार्‍याच्या बसुनी विमानी सहल करूया गगनाची
चला मुलांनो आज पाहूया, शाळा चांदोबा गुरुजींची

आज पौर्णिमा जमले तारे आकाशाच्या वर्गात
चांदोबा गुरुजी तर दिसती कुठल्या मोठ्या मौजात
हसुनी चांदण्या करीती किलबिल अपुल्या इवल्या डोळ्यांची

द्वितीयेपासुनी रोजच येती गुरुजी उशिरा शाळेत
फुले-चांदणी फुलती आणिक सगळी अपुल्या गमतीत
कधी वर्गातून पळते उल्का ओढ लागुनी पृथ्वीची

कुणी तेजाचे ओठ हलवूनी मंगळास वेडावित असे
रागाने मग मंगळ वेडा गोरामोरा होत असे
बघुनी सारे हसताहसता उडते चंगळ तार्‍यांची

कधी वेळेवर केव्हा उशिरा, अवसेला तर पूर्ण रजा
राग कधी ना या गुरुजींना, कधी कुणा करिती ना सजा
असे मिळाया गुरुजी आम्हा करू प्रार्थना देवाची
उल्का - आकाशातून पडलेला तारा.

Please consider the environment before printing.
कागद वाचवा.
कृपया पर्यावरणाचा विचार करा.